Obećal si storit četiri stvari, a storil si samo jednu. Opatijski čarobnjak, sran te more bit. Judi šibajte ga – ionako će finit va bidonu, a još pasano leto je obećal se storit, a storil je samo kvarat obećanja. Va oveh par besed bi se moglo špjegat ča se čera dogajalo va Vasanskoj.
Pred četrdesetak judi, prezidente MO Vasanska, Mladen Žigulić, čestital je 8. mart i podelil mimoze, nakon čega je počel Pusni program.
– Program smo vodili Emil Jeletić, pop Vili Jeletić i moja malenkost. Va kratken kulturno umjetničkom djelu svoje pjesme su pročitali Dino Đelmo i Vili Jeletić, a samo suđenje pustu vodil je Emil Jeletić uz moju asistenciju. Suđeno je za obećanja pusta od pasanega leta, a ovaj novi je uspio samo jednu stvar storit (uređenje Rakovčeve ulice), dok tri stvari ni storil. Znači za dva leta samo jednu stvar je storil ča je stvarno sramota, kazal nan je Mladen Žigulić.
Opatijski čarobnjak je spušten, a za kaznu, po rite su ga z šibami sprašile žene. Nakon čega je va povorke zanešen do kontejnera za smeti kade je i finil.
– Nakon ‘pusnega obreda’ program je prehićen va prostorije VMO Vasanska kade je održano natjecanje va pripreme pusneh slastici. Va oven slučaje, ‘boje polovice’ Vasanske, storile su kolači i fritule, a žiri je odlučil slijedeće. Najboji kolači je storila Meri Tomas, drugo mesto osvojila je Marija Slavić dok je treće mesto pripalo Cvijeti Juranović. Najboje ovoletnje fritule pripremila je Cvijeta Juranović, dok je drugo mesto osvojila Meri Tomas.
– Sako leto parićamo ovaj izbor i judi su jako kuntenti, no moran reć da imamo i parićane nagrade za se ki učestvuju. Tako su naše dobitnice osvojile plaketu i poklon bon besplatnog razvijanja fotografija za dokumente pul Foto Luigia, dodao je Mladen Žigulić.
Izvor: PodUčkun.net
Foto: Nikola Turina
